1. An khuaa doctor awmchhun kha dentist (ha doctor) a ni sia, eng natna pawh entir se, an ha pakhat tal a lo phawisak ngei ngei. Kan thiannu kawthalo chau lutuk tawh pawh kan zawn phei a, a hahmai pakhat a lo phawisak.
2. Jail tâng pakhat hi medical test hrang hrang nei turin clinic-ah a kal a. Blood test a neih hnuin nurse chuan thisen a lâkchhuahna kuta thisen chu tihtâwp tumin a fâwp ngar ngar a. Chutih lai tak chuan jail tângpa chu hlim zetin a rawn lâm ta mai a! Nurse mak ti lutuk chuan, “Engati nge i lâm tâk mai?” a han tih chuan, “Ka test neih leh tur hi zun a nia...” a tia, a’n meng tawlh deuh zek zekah!
3. Meizial a heh lutuk beidawng chu daktawr hnenah a inentir a. Daktawr chuan, "Zan i mut dawnah i mawngah i zûk tur kha i zep ziah dawn nia," a tia, a zep ziah a, a nghei thei ta a. Thla thum vel hnuah a va kal leh a, daktawr chuan, "I nghei thei ta maw? Eng nge i lo kal leh a?" a lo ti chu, "Ka pu, nghei chu ka nghei thei tawh a. Mahse, mawnga meizial zep lovin ka muhil thei lo va," a ti ta! A va hahthlak em!
4. A pasal damlo kha a zun test tur a ni a, a nupuiin a lo tibaw palh a, a hauh a hlau chuan ama zun a lo dah a. Test result a lo chhuah chuan an pain thla 3 mi nau a lo pai. Nurse-ho hrilhhai lutuk chu an inen a, an nui an nui mai.
5. Nula senior ve deuh tawh pawh kha inla-young tawkin a bag të nen damlo kan turin damdawiinah a kal ve a. Kawngka a a lut chiah chu nurse duty chuan, “Nang kha, damdawiin chhungah kuhva zawrh kan phal lo,” a tia, an lo nawr chhuak nawk nawk.
6. Damlo — Ka pu, ka vawih hi a uih theih miah lo. Eng vang nge ni ang?
Daktawr — Vawih han tum chhin teh (Damlo chu a vawih a).
Daktawr — Um, i hnar kha zai a ngai zawk a nih kha.
7. Phaiah daktawr zirin kum nga lai a zuk awm ve a, a ziah fai dan chiah a rawn thiam haw.
8. Damlo — Ka pu, ka chil hi a pût nasa thei lutuk a, uluk deuhin min han en teh.
Daktawr — Eng dang a ni lo, kap râwp chil pût a nih kha.
9. A khup dinglam nâ kha a va entir ve a. Daktawr chuan, "Upat hri ve deuh a nih hi," a lo ti mai a. Ani pek chuan, "Ka khup veilam nen a inrual reng sia," zuk ti a.
10. Hrawk vung burin a inentir a, doctor chuan, “I au vak vak em ni? Tlangau ami i nih?” a lo ti hrep a. Chupa chuan, “Ka pu, profight-a a puang tèngtu kha ka nia,” a ti thâm tuak.
He BLOG-ah hian nitin fiamthu tawi tha tak tak sawmnga chuang post ziah a ni a, i lo tlawh fo dawn nia.
No comments:
Post a Comment