••• Ailawng khaw ho khan Reiek tlang hming thlak chungchang an sawipui a, "Tlang hming thlak theihna khawp thuneihna ka nei lo, in,duh leh Tlanghmingthanga han sawipui rawh u," a lo ti hmak.
••• Ngopaah khan an Badminton khelhna hall kha a bang a var a, shuttle cock hmuh a harsa a tiin hall bang hnawih hrinna tur an lo dil a, "A bang hnawih chuan senso a tam dawn si a, a cock kha hnawih hring zawk mai ula, senso a tlem zawk daih ang chu," a ti e an tia lawm.
••• An kawtzawlah a Minister car kha a inher a. A driver khan an pangpar pot 2 vel kha a su keh palh a. Ani khan, "Lo kal teh," a ti ram hmuk a. Driver kha hlauthawng takin a kal a. Ani chuan, "Hmm, a tha, mipa chuan hmeichhe pangpar hi tihchhiatsak zeuh zeuh tur," a ti hmak.
••• Arakan awm lai khan Sunday school sawihonaah, "In thinur chu niin tlakpui suh se' tih hi a dik lo. Thinur chu niin tlakpui hmak mai se a dik ber a ni," a ti e an tia lawm.
••• Government Press kha Kolasib leh Champhaiah dah an tum a. Assembly session-ah Lunglei MLA Pu F. Pamama'n, "Kolasib leh Champhai aia district senior zawk Saiha leh Lungleiah pawh dah lova hetia Kolasib leh Champhaia dah tum ngawt mai hi a va mak ve, eng nge a chhan? A bialtu Minister leh CM bial a nih vang mai em ni?" a rawn ti a, Pu Rualchhina chuan, "Aw, ni deuh ber e," a ti leh hmak.
••• MSSC (Mizoram State Sports Council) meeting-ah, "Football-ah hian team khatah 9 em ni kha awm thin?" a ti e an tia lawm.
••• "Murlen sanctuary tihphuisuina tura Central-in pawisa a rawn pek nuai 50 la hman loh kha khaw nge a awm?" tiin House-ah an zawt a. "Kan la hman loh chuan khawiah emaw a awm tihna a ni mai," tiin a chhang hmiah.
••• "Dampa sanctuary-ah khuan eng savate nge awm?" an ti leh a. "A tam mai, chhiar theih pawh an ni lo. An duh hun hunah Bangladesh-ah an thlawk thla a, an rawn thlawk chho leh a," a ti.
••• Sannde sikul kal a hmanhmawh deuh a ni ang, a kawr chung nghawngah an nu bra rawn bat lut ngawk ngawk chungin Biak In chhungah a lo lut an ti.
••• VIP light nen Zodin bulah traffic jam-ah an tang a, a driver hnenah, "I riau riau (siren) te kha ti chhuak ve la," a'n tiah.
••• Pu Denga CM lai khan sawrkar a tlu mai dawn, zanah an mangangin zanlai meeting an ko. "CM vangin ka meeting lo vang, silaia inkah a ngaih chuan ka silai nen ka lo chho ang," a ti riap mai.
••• An kawtah truck pakhat iron rod phur a lo ding a, "Hei, ka pu, kan unload dawn e," an tia, "Ngawi teh u, lei tura ka chah ka hre lo," a ti mai a. "Ka pu, lei pawh a ni lo, kan pute'n dah turin min ti a ni," an ti a. "A, ngawi teh u, chutiang a nih chuan Aichhinga te tâ tur a ni ang e," a ti e an ti.
No comments:
Post a Comment