Bete an ngah lutuk a, engtik lai mai pawh hian an hmeh a, a ning lutukin a zin bosan ta a. A zinnaa a thlen inte'n, "Kan mikhualpa hian bete a ei khât ang a, a ei châk ang," tiin Bete bawk an lo hmehpui leh. Ani bete ning lutuk kha an khaw lamah a haw, a fate'n, "Hei ka pa a lo thleng, Bete a ei khât tawh awm sia," an tia, Bete bawk an lo hmehpui leh.
A tukah an makpate inah chaw ei turin phur deuhin a kal leh a, Bete bawk chu cooker-in an lo phittir leh sia, ei lovin a haw ru daih.
Chawlhni zing chhung inkhawm an neih zawh takah chuan chaw ei tura an kil lai takin an thenawm pa chuan Bete a rawn suah pek a, a ner nasa teh asin.
Pa berin hah taka hna a thawh laiin nu ber chu a va phone a, "Nu-i, ka chau sia, chhawhmeh cial deuh lo siam rawh aw..." a ti, nu ber chuan, "Tehreng mai," tiin a lo chhang. Pa ber chu in a thlen veleh Bete tui hâng a lo tulh nghal.
A farnu khan, "Chawhmeh lo suak rawh u," a tia, an fapa naupang ber a va tir a, Bete bawk a lo suah.
Chutah ramah a chaw fun cial deuh mai chu inah a theihnghilh si, a thiante'n, "Lo ei ve mai rawh," an tia, a han kil tan chiah tihah pakhat khan Bete bawk a rawn chhûng a.
A Bete ning lutuk chu phai lamah kal daih a. Gauhati a thleng thla tihah Zo hotel-ah a chawl a, a ei duh zawng a han order ve ngei a, Bete a awm ang tih a ring lo hrim hrim. A order chu an lo pe a, tui ti takin a ei a, a puar kher mai. An siam dan a'n zawt vel chu Bete bawk an lo mix!
Inah a haw a, nu berin chawhmeh a lo kang hmui sar sar a. "Nu-i, i chawhmeh siam a va tui hmel ve. Eng nge ni a?" a han ti chu, "Nia, hei thenawmte Bete min pek kha ka kang e ka tia," tiin nu berin a lo chhang, a hne tawh ngang mai.
Zan an han mu dawn, nu ber a rawn mu lawk si lo. "Nu-i, eng nge i tih em em a?" a han ti chu nu ber chuan, "A va mak teh sek e. Hei, in Bete eina ka tifai a nih hi," a la rawn ti.
Pa: Ka va han hne zozai tak em! Bete te te te tete...
Nu: Awi pa-a hi i zei e...tete a'n ti ngei ah!
Pa: Hm... Mai mai chuan. Bete hi ka hne ka tihna a nih kha maw le.
Nu: Aw le, pa-a, ka heethiam e.
A tuk zingkar hma takah chawhmeh zuar a lo lut, "Ka pu, Bete i lei duh em?" a rawn ti chu a vawm zui lo chauh.
Zanah chhungkuain chanchinthar an en a, a chhiartu Vanlalchhuangi pek chuan, "Vawiin Aizawl bazar thlai rate," tiin Bete rate tlâk hniamzia a la rawn sawi tel hram.
Chutia an chhungkua chauha an awm khawm lai lai tak chuan an thenawmnu a lo lut a, "Bete chi lei tur in nei mial em?" a rawn ti. Pa ber a lo meng rum ûl ringawt.
Chutih lai tak chuan a phone a lo ri a, a han chhang chu Lunglei lama a unaupa a lo ni a, "Naktukah Bete kan rawn thawn dawn a, lo châng r'u aw..." a rawn ti chu phone a off nghal hmak.
A tuk zingkarah pa berin chanchinbu a bih lai takin an awmpuinu chuan, "Ka pu, Bete hi khaw nge ka dah dawn?" a rawn ti. A insum hram a, a chhang lo.
Committee pawimawh tak an neih dawn avangin a insiam a, a pheikhawk thar chu a'n bun ve ngei a. Thui lo tê a kal hman tihah a pheikhawk chhungah lo kam tlattu a awm. Pheikhawk phelh meuhin a han en chiang a, Bete mu bawk!
Committee an zo va, a haw dawnah in neitunu chuan committee-naa lo kal zawng zawngte Bete a hawntir vek!
Ha ha... .
ReplyDelete